അമ്മെ ഉണരൂ
ഒരു ദീന രോദനം മാറ്റൊലി കൊള്ളുന്നു
ഒരു ദുഃഖ ഭേരി തൻ പെരുമ്പറ മുഴങ്ങുന്നു
സഹ്യന്റെ സസ്പൃഹ ഹൃദയം തേങ്ങു-
ന്നസഹ്യമാമൊരു സങ്കട കാഴ്ചയിൽ
മരതക പച്ച പുതച്ചൊരാചെരുവിൽ
മാമല മേടിൻ കുളിർ മടി തട്ടിൽ
കാമന വറ്റിയ കരിമ്പാറ പോലൊരു
ചേതനയറ്റൊരു പെൺ ഗജഗാത്രം
ദീർഘഗഹനമാം മാതൃസുഷുപ്തിയിൻ
പൊരുളറിയാതൊരു കുട്ടി കൊമ്പൻ
കരളു വരളുമാറാടുന്നു ചേഷ്ടകൾ
തരളവിഹ്വലമൊരു സരളമരാള സമം
തട്ടുന്നു , തഴുകുന്നു ചെറുതുമ്പിയാലമ്മയെ
ഒട്ടു നിൽക്കുന്നു വിഭ്രമത്താൽ , പിന്നാഞ്ഞു
മുട്ടുന്നു കുഞ്ഞു മസ്തകത്താലവനുല് -
ഭവിച്ചൊരാ ഗർഭപാത്രത്തെ വീണ്ടും .
നിഷ്ഫലമദ്ധ്വാനമുണരുന്നില്ലമ്മ,യങ്ങു -
ച്ചത്തിൽ ചിന്നം വിളിച്ചവനോടുന്നാ
നിശ്ചലപിണത്തിനെ ചുറ്റുന്നനാരതം
നിശ്ചേഷ്ടശോകംനിശ്ശബ്ദം പ്രകൃതി .
തിര്യക്കിൻ ഭാഷ തിരിച്ചറിയുന്നോർ
ചൊല്ലിയെന്നോടവൻ ചൊല്ലലിന്നിങ്ങനെ
തിരിച്ചറിവില്ലാത്ത ലോകമേ ശ്രവിക്കുകാ
കാതര യാതനാ ദുഃഖ ഗീതം
"കുറുമ്പിനി കാട്ടില്ലയമ്മേ ഞാനിനി
അരുതാത്തതൊന്നും ചെയ്കയില്ല
ഓർമ്മയിൽ വിങ്ങുന്നൻപാർന്നു നീയേവം
ചൊല്ലിയ വാക്കുകൾ ,തീക്ഷ്ണമായി
പാടില്ല മകനെ അവിടേക്കു പോകാ,തതാ
ചതുരനാം ഇരുകാലി ജന്തുവിൻ ഗേഹം
ഒട്ടുനാൾ മുമ്പു നിന്നച്ഛനു ,കൺമണീ
പട്ടടയേകിയി കെട്ടതാം തട്ടകം
മസ്തകം തകർക്കുമാറുഗ്രമായ് പൊട്ടുന്ന
മധുര ഫലങ്ങളും വിഷമുള്ള കനികളും
അഗ്നിസ്ഫുലിംഗമായംഗം തകർക്കുന്ന
ആലക്തികോർജ്ജവും ഗുപ്തമാണവിടെ
ചൊല്ലി നീ ദീനം ഹാ ഗൗനിച്ചില്ല ഞാൻ
മണ്ടി യുത്സാഹ കൂതൂഹല ഗാത്രനായ്
പിന്നിൽ നിൻ ദൃഢ കാലടി ശബ്ദമ,തെന്നു
മെൻ കുസൃതികൾക്കാവേശമായി
പാടില്ലയെന്നെത്ര വിലക്കി നീ പക്ഷെ
പാടുപെട്ടെന്നിട്ടുമനുഗമിക്കുന്നെന്നെ
പട്ടു പോലുള്ള നിൻ തുമ്പിക്കൈസ്പർശ
പാട്ടിനാൽ സാന്ത്വനമെന്നുമേകുന്നു
ശക്തിയേകുന്നൊരാ പാദനിസ്വനം
നിലച്ചതറിഞ്ഞു ഞാൻ പിന്തിരിഞ്ഞപ്പോൾ
കണ്ടതോ നിശ്ചലം ശിലാസമം നീയൊര-
ഗാധമാം നിദ്ര തൻ ഗഹ്വരത്തിൽ
എഴുനേൽക്കുകമ്മെ പിണക്കം മതിയാക്കു
നിന്നോമന കുട്ടനെയൊന്നു നോക്കൂ
കുറുമ്പിനി കാട്ടില്ലയമ്മേ ഞാനിനി
അരുതാത്തതൊന്നും ചെയ്കയില്ല
ആരവം കേൾക്കുന്നമ്മേയായിരുകാലി
ക്കൂട്ടങ്ങളിങ്ങോട്ടെത്തുമിപ്പോൾ
ആവുന്ന പോലെ തടുക്കുമവരെ പക്ഷേ,
ആവതില്ലമ്മേ ഞാൻ കുട്ടിയല്ലേ
എഴുനേൽക്കുകമ്മെ പിണക്കം മതിയാക്കു
നിന്നോമന കുട്ടനെയൊന്നു നോക്കൂ
കുറുമ്പിനി കാട്ടില്ലയമ്മേ ഞാനിനി
അരുതാത്തതൊന്നും ചെയ്കയില്ല "
സഹ്യ ശ്രിംഗങ്ങളിൽ തട്ടിതകർന്നങ്ങു
പൊട്ടി ചിതറുന്നാ കണ്ണീർ വിലാപം
പൊട്ടിക്കരയുവാൻ പോലുമാവാതൊരു
പൊട്ടിയ പട്ടമായ് ഗാഡ്ഗിലിൻ പഠനവും .
Dr Biju John
